Menpekotasun teknologikoa eztabaida politikoen erdigunean dago. Europar Batasuna (EB) nabarmen kezkatuta dago Ameriketako Estatu Batuetako (AEB) erraldoi teknologikoei aurre egiteko duen ezintasunagatik, eta agerian jartzen ari da Europaren zaurgarritasun-egoera atzerriko teknologiekiko, batez ere Estatu Batuekiko eta Txinarekiko: erdieroaleak, gailu elektronikoak, plataforma digitalak, hodeiko konputazioa, azpiegitura kritiko, zibersegurtasun nazionala, besteak beste.
Ildo horretan, batetik, Draghiren txostenak adierazten du AEBren eta EBren arteko produktibitate-arrakalak, neurri handi batean, Europako sektore teknologikoaren ahultasun erlatiboa islatzen duela. Eta, bestetik, Europako Industria Teknologikoaren sektoreak ere “ekintza erradikalak” eskatu dizkio Europar Batasunari atzerriko menpekotasun teknologikoa murrizteko, atzerriko jabetzaren azpiegiturarekiko eta baita zerbitzu digitalekiko ere, beti ere, Europaren subiranotasun teknologikoan urratsak egiteko.
EAEn ere menpekotasun teknologikoaren kezka agerikoa da. 2024ko uztailaren 19an, Microsoft erortzeak, EAEn ere arazoak sortu zituen. Zehazki, EAEko administrazio publikoaren gailu informatikoen %70ak izan zituen arazoak. EAEko 10 ordenagailutik 7k kolapsatu egin ziren, administrazio publikoak duen menpekotasun teknologikoa agerian jarriz. Osakidetzan ere arazo asko detektatu ziren; Izenpe administrazioen identifikazio elektronikorako plataforman ere atzeman zituzten arazoak.
Bestalde, hezkuntza arloan ere, Hezkuntza Komunitatearen jardueraren kudeaketa digital osoa beste teknologika erraldoi baten menpe dago, Google-en menpe hain zuzen ere. Hezkuntza-sisteman bere osotasunean ezarrita dago eta jadanik hiru lege urratzen dituela jakina da.
Gauzak horrela, ezinbestekoa da gaur egun hemen ere, gure txikitasunetik, urratsak egiten hastea: EAEko administrazio publikoak duen menpekotasun teknologikoa zein den jakitea funtsezkoa da, eta hau ezagututa, menpekotasun teknologiko hori murrizteko estrategia diseinatu eta pixkanaka-pixkanaka burutu beharrean gaude.
Hau dela eta, legebiltzarkide gisa dagokidan funtzioa ahalik eta egokien betetzeko eta indarrean dagoen Erregelamenduaren babesean, ondorengo Legez Besteko Proposamena aurkezten dugu.
LEGEZ BESTEKO PROPOSAMENA
Legebiltzarrak Jaurlaritzari eskatzen dio:
- EAEko Administrazio Publikoak duen menpekotasun teknologikoa ezagutzeko diagnostiko- azterlana egin dezala.
- Diagnostiko-azterlana oinarri izanik, “Menpekotasun Teknologikoa murrizteko estrategia” egin dezala, EAEko Administrazio Publikoan pixkanaka menpekotasun teknologikoa murrizteko, tokiko enpresa teknologikoak eta ikerkuntza ekosistema lehenetsiz.
- Diagnostiko-azterlana eta estrategia, biak ala biak, 2026ko lehen sei-hilabetean Erakunde, Gobernantza Publiko eta Segurtasunaren Batzordean aurkez ditzala.
