“Emakumeak Zientzian” ekimena hasten den egun berean, Otsailak 3, goizeko 11:30etan “Industria, Trantsizio Energetiko eta Jasangarritasunaren Batzordea”-n izango dira agerraldiak eta Legebiltzarreko webgunean zuzenean ikusteko aukera izango da.
Gaur egungo gizartean, teknologia eta berrikuntza sektoreak garapen ekonomiko eta sozialaren motor nagusi bihurtu dira. Aro digitalak gaitasun teknologikoak eskatzen ditu arlo guztietan, eta STEAM (Zientzia, Teknologia, Ingeniaritza, Artea eta Matematika) diziplinetan trebatutako profesionalen eskaria etengabe hazten ari da. Hala ere, emakumeen parte-hartzea sektore horietan oraindik oso urria da, kezkagarria.
EAEn, emakumeek STEAM enpleguen %26 baino ez dute betetzen. Gabezia horren atzean faktore ugari daude: txikitatik jasotako genero-estereotipoak, STEAM emakume erreferente falta, bokazio teknologikoen sustapen eskasa, lan-ingurune maskulinizatuak. Horrek eragina du nesken hautu akademikoetan eta, ondorioz, haien ibilbide profesionaletan ere bai.
Aro digitalak, ordea, aukera paregabea eskaintzen du emakumeen talentua aktibatzeko. Adimen artifiziala, zibersegurtasuna, datuen analisia eta ingeniaritza digitala bezalako arloek gaitasun berriak eskatzen dituzte, eta emakumeek ekarpen esanguratsuak egin ditzakete berrikuntzan, ikuspegi anitzak eta gizartearen behar zabalak kontuan hartuta.
Horregatik, ezinbestekoa da emakumeen parte-hartzea sustatzeko estrategia integralak garatzea: bokazio teknologikoak goiztik piztea, mentoretza-programak ezartzea eta enpresen inplikazioa bermatzea. Talentu teknologikoa ez da soilik gaitasun teknikoen kontua; aniztasuna, inklusioa eta gizartearen eraldaketa ere jokoan daude.
Gauzak horrela, 6 emakume teknologo gonbidatu ditugu bere iritzia ematera:
- Matematikan doktorea, Marta Macho Stadler.
- Informatika Ingeniaritzan doktorea, Mari Luz Guenaga Gómez.
- Automatika eta Elektronika Industrialean ingeniaria eta Elektronika eta Komunikazioetan doktorea, Ainara Bilbao Eraña.
- Informatikan doktorea, Olatz Arbelaitz Gallego.
- Informatika Ingeniaria, Lorena Fernández Álvarez.
- Industria-ingeniaria, Aitziber Lasa Iglesias.
